|
The
One o'Clock Gun
What gars the Embro’ man feel prood?
When a’ is said ad dune
It’s no St Giles or Holyrood
but thon big, noisy gun
He’s staundin there in Princes Street
No makin ony fuss,
But richt at Allan Ramsay’s feet
He’s waitin for the bus
When, wow, he gies an unco sterth
Lowps bait feet aff the grun
And by the duntin o’ his hert
He kens he’s heard the gun
Then as the collieshangie stills,
He hears anither soun’
As doos frae a’ the windo-sills
Flee up and circle roun’
But he pretends he disna care;
He thinks it splendid fun
To launch at ony stranger there
That’s frichtened by the gun.
And as he gangs his couthy way
He feels baith glad and prood
That Embro’s gun bangs aff at one
And soun’s sae monstrous lood!
Douglas
Fraser
1963
|